មានអត្ថប្រយោជន៍សុខភាពមួយចំនួនបានលើកឡើងពីសមត្ថភាពនៃគ្រាប់ផ្កាឈូករ័ត្នក្នុងការជំរុញកំណើននៃសក់ លើកកម្ពស់សុខភាពបេះដូង ជំនួយក្នុងការសម្រកទម្ងន់ កម្រិតកូឡេស្តេរ៉ុលទាប និងឥទ្ធិពលប្រឆាំងនឹងជំងឺមហារីក។ វាជាអាហារសម្រន់ដែលមានប្រជាប្រិយបំផុត និងអាចរកបានភ្លាមៗ។ គ្រាប់ផ្កាឈូករ័ត្នមិនត្រឹមតែអាចបរិភោគបានភ្លាមៗប៉ុណ្ណោះទេ ប៉ុន្តែវាថែមទាំងផ្តល់នូវអត្ថប្រយោជន៍ជាច្រើនដល់សុខភាពទៀតផង។

តើគ្រាប់ផ្កាឈូករ័ត្នជាអ្វី?
គ្រាប់ផ្កាឈូករ័ត្នគឺជាសរីរាង្គផ្លែរបស់រុក្ខជាតិផ្កាឈូករ័ត្នដែលមានឈ្មោះវិទ្យាសាស្ត្រថា Helianthus annuus។ គ្រាប់ផ្កាឈូករ័ត្នដែលត្រូវបានគេប្រើជាទូទៅមានចំនួនបីប្រភេទ មួយត្រូវបានគេប្រើសម្រាប់យកប្រេង និងពីរផ្សេងទៀតមានកម្រិតខុសៗគ្នានៃខ្លាញ់ច្រើនប្រភេទ។ នេះគឺជាកន្លែងដែលគ្រាប់ផ្កាឈូករ័ត្នអាចផ្តល់អត្ថប្រយោជន៍ដល់សុខភាព។ គ្រាប់ដែលត្រូវបានគេប្រើញឹកញាប់បំផុតមានឆ្នូត ឬលាយពណ៌ និងមានសំបកខ្មៅរឹង។គ្រាប់ទាំងនេះត្រូវបានគេប្រើជាចម្បងជាអាហារសម្រន់នៅក្នុងផ្នែកជាច្រើននៃពិភពលោក។ ពួកគេអាចត្រូវបានគេបរិភោគទាំងនៅក្នុងទម្រង់ពេញរបស់ពួកគេ ក៏ដូចជាទម្រង់ដែលស្អាតគឺមានតែស្នូលខាងក្នុងប៉ុណ្ណោះដែលត្រូវបានបរិភោគ។ ទាំងសំបក និងស្នូលខាងក្នុងមានទម្រង់ជីវជាតិខុសគ្នា។ ពួកគេធ្វើឱ្យមានរសជាតិឈ្ងុយឆ្ងាញ់ និងមានសារធាតុចិញ្ចឹមច្រើនជាពិសេសនៅពេលបរិភោគលាយអំបិល។

អាហារូបត្ថម្ភផ្កាឈូករ័ត្ន
គ្រាប់ផ្កាឈូករ័ត្នមិនត្រឹមជាអាហារសម្រន់ទេ។ ពួកគេបញ្ជូនបរិមាណវីតាមីនE (alpha-tocopherol) និងB6 ដល់រាងកាយ។ យោងទៅតាម USDA FoodData Central ពួកគេក៏ផ្តល់ឱ្យយើងនូវសារធាតុប្រឆាំងអុកស៊ីតកម្ម និង Carotenoids ជាច្រើនដែលគាំទ្រដល់ប្រព័ន្ធភាពស៊ាំនៃរាងកាយ។ មានបរិមាណជាតិ Thiamine សូដ្យូម ម៉ាញេស្យូម សេលេញ៉ូម ម៉ង់ហ្គាណែស និងផូស្វ័រក្នុងគ្រាប់ខាងក្នុងនៃផ្កាឈូករ័ត្ន ខណៈពេលដែលសំបកខាងក្រៅផ្តល់នូវជាតិសរសៃចំណីអាហារ។ អ្នកក៏អាចរកឃើញជាតិស័ង្កសី ទង់ដែង និងជាតិដែកតិចតួចក្នុងគ្រាប់ទាំងនេះ រួមជាមួយវីតាមីនក្រុមB ជាច្រើន។ ប្រហែលជាអ្វីដែលសំខាន់បំផុតនោះគឺកម្រិតនៃខ្លាញ់ Polyunsaturated នៅក្នុងគ្រាប់ផ្កាឈូករ័ត្ន រួមទាំងបរិមាណ Phytosterols ដែលគួរឱ្យកត់សម្គាល់។ ការទទួលទាន ១/៤ ពែងនៃគ្រាប់ផ្កាឈូករ័ត្នស្ងួតមានផ្ទុកកាឡូរីលើស ២០០ ។

អត្ថប្រយោជន៍នៃគ្រាប់ផ្កាឈូករ័ត្ន
គ្រាប់ផ្កាឈូករ័ត្នផ្តល់អត្ថប្រយោជន៍ជាច្រើនដល់សុខភាពដូចជាជួយលើកកម្ពស់សុខភាពបេះដូង និងស្បែក ជួយជំរុញដល់ការលូតលាស់សក់ ជួយសម្រកទម្ងន់ បញ្ចុះកូឡេស្តេរ៉ូល ប្រឆាំងជំងឺមហារីក និងធ្វើឱ្យមានតុល្យភាពកម្រិតអរម៉ូន។

១) ថែរក្សាស្បែក៖ ការសិក្សាមួយដែលធ្វើឡើងដោយក្រុមអ្នកស្រាវជ្រាវដែលបានចុះផ្សាយក្នុងអត្ថបទអាហារូបត្ថម្ភ បានបង្ហាញថាគ្រាប់ផ្កាឈូករ័ត្ន គឺជាថាមពលនៃសារធាតុប្រឆាំងអុកស៊ីតកម្ម។ សមាសធាតុដ៏ល្អបំផុតមួយនៃគ្រាប់ផ្កាឈូករ័ត្ន គឺមាតិកាវីតាមីនEខ្ពស់។ ដោយប្រហែល ៨០ ភាគរយនៃតម្រូវការប្រចាំថ្ងៃរបស់អ្នកបំពេញដោយគ្រាប់ផ្កាឈូករ័ត្ន ១/៤ ពែង អ្នកនឹងទទួលបានការប្រឆាំងអុកស៊ីតកម្មដ៏សំខាន់ពីការបន្ថែមគ្រាប់ទាំងនេះទៅក្នុងរបបអាហាររបស់អ្នក។ វីតាមីនE អាចដើរតួជាអង់ទីអុកស៊ីដង់សម្រាប់ស្បែក និងត្រូវបានគេដឹងថាធ្វើឱ្យស្បែកមានភាពស្រស់ថ្លាឡើងវិញដោយបង្កើនចរាចរឈាម និងកាត់បន្ថយការលេចចេញស្នាមជ្រីវជ្រួញ។

២) កែលម្អសុខភាពខួរក្បាល៖ គ្រាប់ផ្កាឈូករ័ត្នត្រូវបានគេចាត់ទុកថាជាអាហារល្អបំផុតមួយសម្រាប់ខួរក្បាលរបស់អ្នក។ ពួកវាសំបូរទៅដោយវីតាមីនE ជាសារធាតុចិញ្ចឹមដែលត្រូវបានផ្សារភ្ជាប់ជាមួយនឹងភាពចាស់នៃខួរក្បាលដែលមានសុខភាពល្អ។

៣) ការពារពីការបំផ្លាញកោសិកា៖ គ្រាប់ផ្កាឈូករ័ត្នសម្បូរទៅដោយវីតាមីនE ដែលជាសមាសធាតុសំខាន់នៃតម្រូវការអាហារូបត្ថម្ភប្រចាំថ្ងៃរបស់អ្នក។ គ្រាប់ទាំងនេះគឺជាសារធាតុប្រឆាំងអុកស៊ីតកម្មដ៏អស្ចារ្យដែលបញ្ឈប់ការរីករាលដាលយ៉ាងទូលំទូលាយនៃរ៉ាឌីកាល់សេរីនៅក្នុងខ្លួនមនុស្ស ព្រោះរ៉ាឌីកាល់សេរីអាចនាំឱ្យមានការបំផ្លាញកោសិកា និងជំងឺផ្សេងៗ។ នេះក៏ជាជំនួយក្នុងដំណើរការត្រឹមត្រូវនៃប្រព័ន្ធរបត់ឈាមផងដែរ។ វីតាមីនE ក៏ជួយឱ្យងាយស្រួលក្នុងការកកឈាមដែរ នៅពេលដែលអ្នកមានរបួសខាងក្រៅដោយជួយបង្កើនល្បឿនដំណើរការព្យាបាល។ សារជាតិសេលេញ៉ូម ដែលមាននៅក្នុងគ្រាប់ផ្កាឈូករ័ត្នជួសជុលការខូចខាតកោសិកា និងលុបបំបាត់ការរីករាលដាលនៃកោសិកាមហារីក។

៤) ថែទាំ​សក់៖ គ្រាប់ផ្កាឈូករ័ត្នមានផ្ទុកវីតាមីនE ដែលមិនត្រឹមតែល្អសម្រាប់ស្បែកប៉ុណ្ណោះទេថែមទាំងសក់ទៀតផង។ ប្រសិនបើអ្នកញ៉ាំគ្រាប់ទាំងនេះជាទៀងទាត់វាអាចធ្វើឱ្យសក់របស់អ្នកមានវាយនភាពល្អ។ ក្រៅពីសារធាតុរ៉ែ និងសារធាតុប្រឆាំងអុកស៊ីតកម្ម គ្រាប់ផ្កាឈូករ័ត្នមានផ្ទុកជាតិដែកដែលអាចជួយជំរុញចលនាឈាមរត់ និងជំរុញលំហូរឈាមទៅកាន់ស្បែកក្បាលដូច្នេះវាជួយជំរុញដល់កំណើនសក់។

៥) គ្រប់គ្រងកំរិតកូលេស្តេរ៉ុល៖ ការសិក្សាស្រាវជ្រាវមួយនៅក្នុងអត្ថបទសរីរវិទ្យា និងឱសថវិទ្យានៃប្រទេសកាណាដាបានបង្ហាញថាសារធាតុ phytosterols គឺជាសមាសធាតុគ្រប់គ្រងកូឡេស្តេរ៉ុលដ៏អស្ចារ្យ។ Phytosterols ត្រូវបានគេរកឃើញនៅក្នុងកំហាប់ខ្ពស់បំផុតនៅក្នុងគ្រាប់ផ្កាឈូករ័ត្ន និង គ្រាប់សណ្ដែករីករាយ។ ដូច្នេះការទទួលទានគ្រាប់ទាំងនេះមួយក្តាប់តូចរាល់ថ្ងៃអាចជួយការពារបេះដូងអ្នកដោយការបន្ថយកម្រិតកូឡេស្តេរ៉ុលអាក្រក់ និងការកើនឡើងកំណកក្នុងសរសៃឈាម។

៦) តុល្យភាពកំរិតអរម៉ូន៖ ការស្រាវជ្រាវបានភ្ជាប់គ្រាប់ពូជផ្កាឈូករ័ត្នទៅនឹងដំណើរការល្អនៃក្រពេញទីរ៉ូអ៊ីត។ គ្រាប់ទាំងនេះសំបូរទៅដោយអាស៊ីតខ្លាញ់សំខាន់ៗដូចជាអូមេហ្គា៣ និងអូមេហ្គា៦ ដូច្នេះពួកគេជួយឱ្យក្រពេញទីរ៉ូអ៊ីតរក្សានូវការធ្វើមេតាបូលីសបានល្អប្រសើរ។

៧) ធ្វើឱ្យប្រសើរឡើងនូវការរំលាយអាហារ៖ គ្រាប់ផ្កាឈូករ័ត្នមានបរិមាណដ៏ច្រើននៃជាតិសរសៃចំណីអាហារដែលជួយជំរុញចលនាដែលត្រឹមត្រូវនៃពោះវៀន។ ប្រសិនបើរាងកាយរបស់អ្នកខ្វះជាតិសរសៃអ្នកអាចមានហានិភ័យខ្ពស់ក្នុងការវិវត្តទៅជាបញ្ហាសុខភាពដទៃទៀតដូចជាការទល់លាមក និងជំងឺឫសដូងបាត។ បញ្ហារំលាយអាហារធ្ងន់ធ្ងរអាចបង្កើនការពុលនៅក្នុងពោះវៀនរបស់អ្នក។ បរិមាណជាតិសរសៃដែលត្រូវបានណែនាំគឺប្រហែល ៣០ ក្រាមក្នុងមួយថ្ងៃសម្រាប់មនុស្សពេញវ័យ។ ទោះយ៉ាងណាក៏ដោយវាត្រូវបានគេកត់សម្គាល់នៅក្នុងការស្ទង់មតិថា មនុស្សភាគច្រើនទទួលទានមិនបានសូម្បីតែ ១៥ ក្រាមក្នុងមួយថ្ងៃ។ តាមរយៈការដាក់បញ្ចូលគ្រាប់ផ្កាឈូករ័ត្នក្នុងរបបអាហារ អ្នកអាចទទួលបានការផ្គត់ផ្គង់ជាតិសរសៃយ៉ាងច្រើន និងកាត់បន្ថយលទ្ធភាពនៃបញ្ហាដែលទាក់ទងនឹងការរំលាយអាហារ។ វាក៏អាចធ្វើឱ្យប្រសើរឡើងនូវតុល្យភាពបាក់តេរីនៅក្នុងពោះវៀនរបស់អ្នក និងធ្វើឱ្យការស្រូបយកសារធាតុចិញ្ចឹមមានប្រសិទ្ធភាពជាងមុន។

៨) បង្កើនកម្រិតថាមពល៖ អត្តពលិកភាគច្រើនចូលចិត្តញ៉ាំគ្រាប់ផ្កាឈូករ័ត្នព្រោះគ្រាប់ទាំងនេះផ្តល់បរិមាណប្រូតេអ៊ីន និងកាបូអ៊ីដ្រាតច្រើន។ ពួកគេជួយដល់ការបញ្ចេញជាតិគ្លីកូហ្សែនរបស់ថ្លើមទៅក្នុងចរន្តឈាម ដែល Glycogen គឺជាទម្រង់នៃជាតិស្ករ។ ដោយហេតុនេះវាផ្តល់នូវការជម្រុញបន្ថែមនៃថាមពលយ៉ាងរហ័ស។

៩) លក្ខណៈសម្បត្តិប្រឆាំងនឹងជំងឺមហារីក៖ ដោយយោងតាម Ruchika Nandha ឆ្នាំ២០១៤ បាននិយាយថា Phytosterols នៅក្នុងគ្រាប់ផ្កាឈូករ័ត្នមានសក្តានុពលក្នុងការកាត់បន្ថយហានិភ័យនៃជំងឺមហារីកពោះវៀនធំ និងបង្កើនភាពស៊ាំ។ គ្រាប់ផ្កាឈូករ័ត្នមានបរិមាណសេលេញ៉ូមសមរម្យ ហើយការសិក្សាបានភ្ជាប់សេលេញ៉ូមដើម្បីការពារការរាលដាល និងការកើតឡើងនៃជំងឺមហារីក។ សារធាតុរ៉ែតូចៗនេះដើរតួជាសារធាតុប្រឆាំងអុកស៊ីតកម្មដ៏មានឥទ្ធិពលនៅក្នុងខ្លួន។ វាអាចបន្ថយស្ត្រេសអុកស៊ីតកម្ម និងបន្សាបរ៉ាឌីកាល់សេរីមុនពេលពួកវាអាចបង្កការខូចខាតច្រើនពេក។

១០) ធ្វើឱ្យប្រសើរឡើងនូវអារម្មណ៍៖ ម៉ាញ៉េស្យូមត្រូវបានផ្សារភ្ជាប់ទៅនឹងការធ្វើឱ្យប្រសើរឡើងនូវអារម្មណ៍ និងចរិត។ នេះគឺជាសារធាតុរ៉ែមួយក្នុងចំណោមសារធាតុរ៉ែដែលមានកំហាប់ល្មមនៅក្នុងគ្រាប់ផ្កាឈូករ័ត្ន។ ប្រសិនបើអ្នកទទួលរងពីការថប់បារម្មណ៍ ឬធ្លាក់ទឹកចិត្តជាទៀងទាត់ នេះប្រហែលជាអាហារសម្រន់ល្អសម្រាប់អ្នក។

១១) ជំនួយក្នុងការគេង៖ ទាក់ទងនឹងការធ្វើឱ្យប្រសើរឡើងនូវដំណេកម៉ាញេស្យូមអាចជួយឱ្យរាងកាយបំលែង Tryptophan ទៅជា Serotonin ។ វាគឺជាអរម៉ូនដែលមានអារម្មណ៍ល្អដែលអាចជួយឱ្យរាងកាយសម្រាក និងឆាប់គេងលក់។

១២) ជំរុញការលូតលាស់ និងការអភិវឌ្ឍ៖ ប្រូតេអ៊ីនមានផ្ទុកអាស៊ីតអាមីណេដែលជាផ្នែកសំខាន់នៃរាងកាយ។ ទោះបីជាបរិមាណប្រូតេអ៊ីននៅក្នុងគ្រាប់ឈូករ័ត្នទាំងនេះមានតិចតួចក៏ដោយក៏វានៅតែអាចជួយក្នុងការលូតលាស់ និងការអភិវឌ្ឍរាងកាយបានដែរ។

១៣) គ្រប់គ្រងជំងឺលើសឈាម៖ ម៉ាញ៉េស្យូមដើរតួយ៉ាងសំខាន់ក្នុងបណ្តាញកាល់ស្យូមនៃរាងកាយដែលអាចជះឥទ្ធិពលយ៉ាងខ្លាំងទៅលើតុល្យភាពអេឡិចត្រូលីត្រ និងសម្ពាធឈាម។ ជិត ៣០% នៃតំរូវការប្រចាំថ្ងៃរបស់អ្នកម៉ាញ៉េស្យូមត្រូវបានបំពេញដោយពែង ១/៤ នៃគ្រាប់ឈូករ័ត្ន។ ដូច្នេះវាអាចជាឱសថដ៏ល្អសម្រាប់រោគសញ្ញានៃជំងឺលើសឈាម។

១៤) ពង្រឹងឆ្អឹង និងសាច់ដុំ៖ ជាតិដែកដែលមាននៅក្នុងគ្រាប់ផ្កាឈូករ័ត្នចែកចាយអុកស៊ីសែនទៅកាន់សាច់ដុំរបស់អ្នកខណៈពេលដែលស័ង្កសីជួយពង្រឹងប្រព័ន្ធភាពស៊ាំរបស់អ្នក និងជួយអ្នកជៀសវាងក្អក និងផ្ដាសាយ។ ម៉ាញ៉េស្យូមដែលមាននៅក្នុងគ្រាប់ទាំងនេះក៏ចាំបាច់សម្រាប់ឆ្អឹងរឹងមាំ និងផលិតកម្មថាមពលផងដែរ។ ស្ទើរតែ ២/៣ នៃម៉ាញ៉េស្យូមនៅក្នុងខ្លួនមនុស្សត្រូវបានផ្ទុកនៅក្នុងឆ្អឹង។ ម៉ាញ៉េស្យូមជួយឆ្អឹងនៅក្នុងរចនាសម្ព័ន្ធ និងកម្លាំងរាងកាយរបស់ពួកគេខណៈពេលដែលម៉ាញ៉េស្យូមដែលនៅសល់ត្រូវបានរកឃើញនៅលើផ្ទៃឆ្អឹងដែលត្រូវបានប្រើប្រាស់ដោយរាងកាយតាមតម្រូវការ។

១៥) បំបាត់ការឈឺចាប់ពីការរលាកសន្លាក់៖  មនុស្សមួយចំនួនពឹងផ្អែកលើគ្រាប់ផ្កាឈូករ័ត្នដោយសារតែមាតិកាវីតាមីនEរបស់ពួកគេ។ វីតាមីនប្រឆាំងអុកស៊ីតកម្មនេះត្រូវបានផ្សារភ្ជាប់ដោយផ្ទាល់ទៅនឹងរោគសញ្ញាថយចុះនៃជំងឺរលាកសន្លាក់ និងជំងឺរលាកផ្សេងៗទៀតនៅទូទាំងខ្លួន។

១៦) មានប្រយោជន៍ក្នុងអំឡុងពេលមានផ្ទៃពោះ៖ គ្រាប់ផ្កាឈូករ័ត្នសម្បូរទៅដោយFolate ដែលត្រូវបានគេស្គាល់ផងដែរថាអាស៊ីតហ្វូលិកដែលជាប្រភេទវីតាមីនB។ អាស៊ីតនេះល្អសម្រាប់ការមានផ្ទៃពោះព្រោះវាជួយក្នុងការផលិតកោសិកាថ្មីក្នុងរាងកាយ ជួយជំរុញការចម្លង DNA និង RNA  ដែលមានសារៈសំខាន់ខ្លាំងណាស់សម្រាប់ការលូតលាស់ និងការអភិវឌ្ឍរបស់ទារក។ វាធ្វើការក្នុងការផ្សារភ្ជាប់ជាមួយនឹងវីតាមីន B-12 ដើម្បីបង្កើតអេម៉ូក្លូប៊ីននៅក្នុងកោសិកាឈាមក្រហម។ តាមរយៈការមានជាតិ Folate គ្រប់គ្រាន់នៅក្នុងខ្លួនអ្នកណអ្នកក៏អាចបន្ថយឱកាសនៃជំងឺបេះដូងបានផងដែរ។ 

ប្រភព៖ OrganicFacts: by John Staughton (BASc, BFA) last updated - February 28, 2020