អ្នកនាង ប៊ី ម៉ូលីវ៉ាន់
សហស្ថាបនិក
អ្នកនាង ម៉ូលីវ៉ាន់ជាអ្នកឯកទេសផ្នែកកែច្នៃចំណីអាហារដែលឯកទេសរបស់អ្នកនាងផ្តោតសំខាន់ទៅលើការគ្រប់គ្រងផលិតកម្មអាហារដែលរួមមាន ការគ្រប់គ្រងគុណភាពនិងអនាម័យ និងការបន្ថែមសារធាតុចិញ្ចឹមចាំបាច់ទៅក្នុងចំណីអាហារ។ ដោយមានគោលបំណងក្នុងការចូលរួមដោះស្រាយបញ្ហាផ្សេងៗនៅក្នុងខ្សែរសង្វាក់ផលិតកម្មកសិកម្មនៅកម្ពុជា អ្នកនាងបានបន្តការសិក្សានិងបញ្ចប់ថ្នាក់អនុបណ្ឌិតផ្នែកកសិពាណិជ្ជកម្មនៅសាកលវិទ្យាល័យមែលប៊ន ប្រទេសអូស្រ្តាលី។ អ្នកនាងម៉ូលីវ៉ាន់មានបទពិសោធន៍ធ្វើការជាច្រើនឆ្នាំជាមួយវិស័យឯកជន ដែលការងាររបស់អ្នកនាងផ្តោតការយកចិត្តទុកដាក់ទៅលើការបង្កើនគុណភាព និងសុវត្តិភាពចំណីអាហារ។ សព្វថ្ងៃអ្នកនាងកំពុងបម្រើការក្នុងគម្រោងមួយដែលសហការជាមួយសមាគមកសិករជាច្រើននៅខេត្តមណ្ឌលគីរីក្នុងការលើកម្ពស់ជីវភាព និងពង្រឹងសន្តិសុខស្បៀងរបស់កសិករខ្នាតតូច។

លោក សេង រ៉ាឌីន
សហស្ថាបនិក

លោករ៉ាឌីន ជាបុគ្គលមួយរូបដែលមានឆន្ទៈក្នុងការធ្វើអោយមាននូវការផ្លាស់ប្តូរក្នុងវិស័យកសិពាណិជ្ជកម្មនៅកម្ពុជា។  គាត់បានបញ្ចប់ការសិក្សាថ្នាក់អនុបណ្ឌិតផ្នែកកសិពាណិជ្ជកម្មនៅសាកលវិទ្យាល័យគ្វីនស៍លែន ប្រទេសអូស្រ្តាលី ដែលកាសិក្សារបស់លោកផ្តោតទៅលើការអភិវឌ្ឍន៍វិស័យកសិកម្មដោយផ្អែកលើពាណិជ្ជកម្មជាមូលដ្ឋាន។ លោក រ៉ាឌីន​ មានបទពិសោធន៍ធ្វើការជាច្រើនឆ្នាំក្នុងវិស័យកសិកម្មដោយលោកធ្លាប់បំរើការជា ទីប្រឹក្សាផ្នែកបច្ចេកទេសក្នុងគម្រោងថ្នាក់ជាតិជាច្រើនដែលមានទិសដៅអភិវឌ្ឍវិស័យកសិកម្ម។ ការងាររបស់លោកផ្តោតទៅលើ ការបង្កើនផលិតភាពកសិកម្ម ការអភិវឌ្ឍន៍វិស័យកសិពាណិជ្ជកម្ម ការគ្រប់គ្រងខ្សែរសង្វាក់ផលិតកម្មកសិកម្ម និងការរៀបចំយុទ្ធសាស្រ្តផលិតកម្មស្របតាមតំរូវការទីផ្សារ។

គោលដៅរបស់លោកគឺសម្រេចអោយបាននូវប្រព័ន្ធខែ្សរសង្វាក់ផលិតកម្មកសិកម្មដែលមានប្រសិទ្ធិភាព និងប្រសិទ្ធិផល។ 


លោក ខាន់ កុសល
សហស្ថាបនិក

លោកកុសល ជាម្ចាស់កសិដ្ឋានមួយរូបដែលបានបញ្ចប់ការសិក្សាថ្នាក់បរិញ្ញាប័ត្រផ្នែកក្សេត្រសាស្រ្ត និងថ្នាក់អនុបណ្ឌិតផ្នែកការគ្រប់គ្រងចម្រុះសម្រាប់ការអភិវឌ្ឍន៍កសិកម្មនិងជនបទ ពីសាកលវិទ្យាល័យភូមិន្ទកសិកម្ម។ ក្រៅអំពីការគ្រប់គ្រងកសិដ្ឋានផ្ទាល់ខ្លួន គាត់ក៏បានបំពេញការងារជាអ្នកប្រឹក្សាឯករាជ្យដែលផ្តល់ការប្រឹក្សាដល់វិនិយោគិនជនជាតិជប៉ុនទាំងឡាយដែលមានចំណាប់អារម្មណ៍ក្នុងការបណ្តាក់ទុនធ្វើអាជីវកម្មក្នុងវិស័យកសិកម្មនៅប្រទេសកម្ពុជា។​ ជាមួយបទពិសោធន៍ក្នុងនាមជាអ្នកផលិត និងលក់កសិផលរយៈពេលជាង​ ១០ឆ្នាំ លោកកុសលយល់ច្បាស់អំពីបញ្ហាដែលកសិករកំពុងជួបប្រទះ ហើយតែងចិញ្ចឹមចិត្តថានឹងអាចចូលរួមជួយកសិករ ផលិតករអោយស្រឡាញ់អាជីព និងអភិវឌ្ឍខ្លួនអោយកាន់តែប្រសើរ។ 

សព្វថ្ងៃលោកកុសលក៏ជាសមាជិកនៃសមាគមអ្នកផលិតម្រេចស្រយ៉ង់កោះកេរ្តិ៍​​ នៅខេត្តព្រះវិហារ ហើយក៏ជាសមាជិកគណកម្មការសាលាមិត្តភាពខ្មែរ-ជប៉ុន​ និងមូលនិធិខ្មែរជំនួយការសិក្សា និងជាប្រធានសមាគមអតីតសិស្សនៃសាលាមិត្តភាពខ្មែរ-ជប៉ុន​​ ផងដែរ។