ផ្លែសាវម៉ាវ មានដើមកំណើតមកពីអាស៊ីអាគ្នេយ៍ ច្រើនដុះនៅតំបន់អនុត្រូពិច និងត្រូពិក ។ ពួកវាលូតលាស់មិនបានល្អទេនៅក្នុងអាកាសធាតុត្រជាក់។ ផ្លែនេះស្ថិតនៅក្នុងអំបូរជាមួយផ្លែគូលេន និងផ្លែមៀន ថែមទាំងមានរូបរាងស្រដៀងគ្នានៅពេលដែលបកសំបកវាចេញ។ សាច់ពណ៌សល្អក់របស់វាមានរសជាតិឈ្ងុយឆ្ងាញ់ និងមានគ្រាប់នៅកណ្តាល។ ផ្លែសាវម៉ាវមានសារធាតុចិញ្ចឹមខ្ពស់ហើយអាចផ្តល់អត្ថប្រយោជន៍ដល់សុខភាពរាប់ចាប់ពីការសម្រកទម្ងន់ និងការរំលាយអាហារបានល្អរហូតដល់ការបង្កើនភាពធន់នឹងការឆ្លងជំងឺ។

សំបូរទៅដោយសារធាតុចិញ្ចឹម និងសារធាតុប្រឆាំងអុកស៊ីតកម្ម៖ ផ្លែសាវម៉ាវសំបូរទៅដោយវីតាមីន ជាតិរ៉ែ និងសមាសធាតុមានប្រយោជន៍ជាច្រើនផ្សេងទៀត។ សាច់របស់វាផ្តល់នូវជាតិសរសៃសរុបប្រហែល ១,៣ ទៅ ២ក្រាម នៃសាច់១០០ក្រាម ដែលស្រដៀងនឹងបរិមាណដែលបានរកឃើញក្នុងផ្លែប៉ោមនិងផ្លែក្រូច។ វាក៏សំបូរទៅដោយវីតាមីនCដែលជាសារធាតុចិញ្ចឹមដែលជួយឱ្យរាងកាយរបស់អ្នកស្រូបយកជាតិដែកបានយ៉ាងងាយស្រួល។ វីតាមីននេះក៏ដើរតួជាអង់ទីអុកស៊ីដង់ការពារកោសិកាក្នុងខ្លួនអ្នកពីការបំផ្លាញ។ ការបរិភោគផ្លែសាវម៉ាវ ៥ ទៅ៦ ផ្លែនឹងបំពេញបាន ៥០ ភាគរយនៃតម្រូវការវីតាមីនCប្រចាំថ្ងៃរបស់អ្នក។ 

ផ្លែសាវម៉ាវមានបរិមាណទង់ដែងល្អដែលដើរតួក្នុងការលូតលាស់ និងថែរក្សាកោសិកាផ្សេងៗរួមទាំងឆ្អឹងខួរក្បាល និងបេះដូង។ វាផ្តល់នូវបរិមាណម៉ង់ហ្គាណែស ផូស្វ័រ ប៉ូតាស្យូម ម៉ាញ៉េស្យូម ជាតិដែក និងស័ង្កសីតិចតួចផងដែរ។ ទទួលទានសាវម៉ាវ ១០០ ក្រាមនឹងបំពេញបាន ២០% នៃតម្រូវការទង់ដែងប្រចាំថ្ងៃរបស់អ្នក និង ២​ទៅ៦% នៃបរិមាណសារធាតុចិញ្ចឹមផ្សេងទៀតដែលបានណែនាំប្រចាំថ្ងៃ។

សំបក និងគ្រាប់របស់ផ្លែសាវម៉ាវត្រូវបានគេគិតថាជាប្រភពនៃសារធាតុចិញ្ចឹម សារធាតុប្រឆាំងអុកស៊ីតកម្ម និងសមាសធាតុមានប្រយោជន៍ផ្សេងទៀត។ ទោះបីជាមានអ្នកខ្លះបរិភោគវាក៏ដោយក៏បច្ចុប្បន្ននេះមិនត្រូវបានគេចាត់ទុកថាអាចបរិភោគបានទេ។ 

ជម្រុញឱ្យការរំលាយអាហារដំណើរការបានល្អ៖ ផ្លែសាវម៉ាវអាចរួមចំណែកដល់ការរំលាយអាហារដែលមានសុខភាពល្អដោយសារតែការផ្ទុកជាតិសរសៃរបស់វា។ ប្រហែលជាពាក់កណ្តាលនៃជាតិសរសៃនៅក្នុងសាច់របស់វា គឺមិនរលាយដែលមានន័យថាវាឆ្លងកាត់ពោះវៀនរបស់អ្នកដោយមិនមានការរំលាយ។ ជាតិសរសៃដែលមិនរលាយជួយបង្កើនល្បឿននៃការឆ្លងកាត់ពោះវៀនរបស់អាហារ ដូច្នេះវាកាត់បន្ថយការនៃការទល់លាមករបស់អ្នក។ពាក់កណ្តាលទៀតនៃជាតិសរសៃគឺរលាយ ដែលជាតិសរសៃរលាយផ្តល់នូវអាហារសម្រាប់បាក់តេរីពោះវៀនមានប្រយោជន៍។ នៅក្នុងពេលនោះបាក់តេរីល្អទាំងនេះផលិតអាស៊ីតខ្លាញ់ដែលមានច្រវ៉ាក់ខ្លីដូចជា acetate, propionate និង butyrate ដែលចិញ្ចឹមកោសិកានៃពោះវៀនរបស់អ្នក។

អាចជួយបញ្ចុះទម្ងន់៖ ដូចគ្នានឹងផ្លែឈើដទៃដែរ ផ្លែសាវម៉ាវអាចការពារការឡើងទម្ងន់ និងលើកកម្ពស់ការសម្រកទម្ងន់សន្សឹមៗ។ វាមានប្រហែល ៧៥ កាឡូរី និង ១,៣ ទៅ ២ក្រាមនៃជាតិសរសៃក្នុង១០០ក្រាមរបស់ផ្លែសាវម៉ាវ។ ផ្លែសាវម៉ាវមានកាឡូរីទាបតែសំបូរទៅដោយជាតិទឹក និងជាតិសរសៃ។ ការបរិភោគវាអាចធ្វើឱ្យអ្នកមានអារម្មណ៍ថាឆ្អែតបានយូរ បណ្តាលឱ្យស្រកទម្ងន់សន្សឹមៗ។

អាចជួយប្រយុទ្ធប្រឆាំងនឹងការឆ្លង៖ផ្លែសាវម៉ាវរួមចំណែកដល់ការធ្វើឱ្យប្រព័ន្ធភាពស៊ាំខ្លាំងក្លាជាងមុនតាមវិធីជាច្រើន។ វាសំបូរទៅដោយវីតាមីនCដែលអាចជម្រុញការផលិតកោសិកាឈាមសដែលរាងកាយរបស់អ្នកត្រូវការដើម្បីប្រយុទ្ធប្រឆាំងនឹងការឆ្លង។ ការទទួលបានវីតាមីនCតិចពេកនៅក្នុងរបបអាហាររបស់អ្នកអាចធ្វើឱ្យប្រព័ន្ធភាពស៊ាំរបស់អ្នកចុះខ្សោយដែលធ្វើឱ្យអ្នកងាយនឹងឆ្លងរោគ។

អត្ថប្រយោជន៍សក្តានុពលផ្សេងទៀត

ផ្លែសាវម៉ាវអាចផ្តល់អត្ថប្រយោជន៍សុខភាពបន្ថែមទៀត - ការស្រាវជ្រាវដែលល្អបំផុតរួមមាន៖
·      អាចកាត់បន្ថយហានិភ័យនៃជំងឺមហារីក៖ ការសិក្សាលើកោសិកា និងសត្វមួយចំនួនបានរកឃើញថាសមាសធាតុនៅក្នុងសាវម៉ាវអាចជួយទប់ស្កាត់ការលូតលាស់ និងការរីករាលដាលនៃកោសិកាមហារីក។
·      អាចការពារប្រឆាំងនឹងជំងឺបេះដូង៖ ការសិក្សាមួយបានបង្ហាញថាសារធាតុចម្រាញ់ពីផ្លែសាវម៉ាវកាត់បន្ថយកូលេស្តេរ៉ុល និងកម្រិតទ្រីគ្លីសេរីតក្នុងកណ្តុរដែលមានជំងឺទឹកនោមផ្អែម។
·      អាចការពារប្រឆាំងនឹងជំងឺទឹកនោមផ្អែម៖ ការសិក្សាលើកោសិកា និងសត្វបានបង្ហាញថាផ្លែសាវម៉ាវចម្រាញ់អាចបង្កើនភាពប្រែប្រួលអាំងស៊ុយលីន និងកាត់បន្ថយកម្រិតជាតិស្ករក្នុងឈាម និងបង្កើនភាពធន់ទៅនឹងអាំងស៊ុយលីន។ 

ប្រភព៖ HealthLine: Written by Alina Petre, MS, RD (NL) on December 7, 2018.