ខ្ញីជាគ្រឿងផ្សំដ៏ចំណានដែលមានប្រើក្នុងមុខម្ហូបរបស់ប្រទេសជាច្រើននៅលើពិភពលោក។ នៅអឺរ៉ុបគេចាត់ទុកខ្ញីជាអាហារដែលមានឥទ្ធិពលលើកតម្កើងសម្រើបតណ្ហាផ្លូវភេទ! ប៉ុន្តែនេះមិនមែនផលប្រយោជន៍តែមួយរបស់ខ្ញីឡើយ។ ខ្ញីត្រូវបានចាត់ទុកជាឱសថម៉ឺនឆ្នាំប្រើប្រាស់សម្រាប់ប្រយុទ្ធប្រឆាំងនឹងការចម្លងរោគ ភាពនឿយហត់ ការឈឺចុកចាប់សាច់ដុំ និងពិសេសដើម្បីការពារប្រព័ន្ធរំលាយអាហារប្រឆាំងទប់នឹងអាការៈក្អួតចង្អោរ រាករូស។
ខ្ញីជារុក្ខជាតិដាំដុះច្រើននៅតំបន់ត្រូពិកមានពន្លឺ និងកម្តៅព្រះអាទិត្យ។ គេបានរកឃើញដានជាលាយលក្ខណ៍អក្សរ ស្តីពីអំពីការទទួលទានខ្ញីតាំងពីជាង៣៥០០ឆ្នាំមុន ឯគុណប្រយោជន៍របស់ខ្ញីក៏ត្រូវបានគេកត់ត្រាទុកតាំងពីជាង៥០០០ឆ្នាំមុនឯណោះ។ ខ្ញីនេះមានប្រើប្រាស់ច្រើនជាយូរយារណាស់មកហើយនៅតំបន់អាស៊ីជាម្ហូប និងជាឱសថ និងទើបនាំទៅកាន់ពិភពអឺរ៉ុបតាមរយៈពួករ៉ូម៉ាំង និងក្រិក។ ប៉ុន្តែពេលនេះ ពិភពលោកទាំងមូលបានស្គាល់ខ្ញី និងទទួលស្គាល់ថាវាជាថ្នាំដ៏សក្តិសិទ្ធិសម្រាប់ព្យាបាលជំងឺរលាកពោះវៀន ផ្តាសាយ ឬសម្រាប់ការសម្រកទម្ងន់។
ខ្ញីជាឱសថព្យាបាលជំងឺអ្វីខ្លះ ?
ខ្ញីជារុក្ខជាតិដែលមានប្រើប្រាស់តាំងពីយូរយារណាស់មកហើយនៅលើពិភពលោកសម្រាប់ធ្វើជាឱសថព្យាបាលជំងឺ។ វាជួយរំញោចប្រព័ន្ធការពារខ្លួន ប្រឆាំងនឹងការរលាក ប្រឆាំងនឹងវីរុស ជំនួយការប្រយុទ្ធប្រឆាំងនឹងអាការៈក្តៅខ្លួន គ្រុនផ្តាសាយ អាល់ឡែកហ្ស៊ី កាន់បន្ថយការឈឺចុកចាប់ ... រំញោចឱ្យមានចំណង់ទទួលទានអាហារ ជួយពោះវៀន និងប្រព័ន្ធរំលាយអាហារ ទប់ស្កាត់ការក្អួតចង្អោរ រំញោចពង្រឹងសរីរាង្គ... ខ្ញីក៏ជាជំនួយផ្នែកវីតាមីសេប្រសិនបើយើងទទួលទានជាបន្លែស្រស់។ គុណប្រយោជន៍របស់ខ្ញី មកលើសុខភាពមានច្រើនអនេក។
គុណប្រយោជន៍មួយក្នុងចំណោមគុណប្រយោជន៍របស់ខ្ញីដែលគ្មាននរណាសូវស្គាល់នោះគឺសមត្ថភាពផ្នែកសម្រួលប្រព័ន្ធរំលាយអាហារ។ បើតាមការសិក្សាខ្លះ មើមខ្ញីជាឱសថជំនួយពន្លឿនដំណើរការមេតាបូលីស ពោលគឺជួយពន្លឿនដំណើររំលាយអាហារ។ ជាមួយនឹងសមត្ថភាពជួយដុតសារធាតុខ្លាញ់ និងជួយសម្អាតបំពង់អាហារ ខ្ញីជាមិត្តដ៏ប្រពៃរបស់ម្ហូបអាហារដែលមានសាច់និងខ្លាញ់ច្រើន។ ការសិក្សាវេជ្ជសាស្ត្រជាច្រើនទៀត បានបង្ហាញថាខ្ញីជួយទ្រទ្រង់ស្រទាប់កោសិកាពោះវៀនឱ្យមានសុខភាពល្អ។
នៅឆ្នាំ១៩៩៩ អង្គការសុខភាពពិភពលោក បានប្រកាសទទួលស្គាល់ប្រយោជន៍របស់មើមខ្ញីសម្រាប់ប្រយុទ្ធប្រឆាំងនឹងរោគចង់ចង្អោរ ក្អួត របស់ស្ត្រីមានផ្ទៃពោះ។ ដូច្នេះខ្ញីអាចជំនួសថ្នាំវីតាមីនB6ដែលគ្រូពេទ្យច្រើនចេញវេជ្ជបញ្ជាដល់ស្ត្រីមានគភ៌។ សារធាតុសកម្មក្នុងខ្ញីដើរតួនាទីសំខាន់ក្នុងការទប់កំអួត ទប់ស្កាត់ចលនាក្នុងក្រពះ ហេតុដូច្នេះហើយបានជាខ្ញីកំពុងត្រូវបានគេសិក្សាចង់យកទៅប្រើប្រាស់ជាថ្នាំសម្រាប់ទទួលទានក្រោយពេលវះកាត់រួចដើម្បីទប់ស្កាត់អាការៈក្អួត។ ប្រសិនបើអ្នកជាបុគ្គលពុលឡាន សូមទទួលទានទឹកតែខ្ញី ឬខ្ញីឱ្យបាន១០ក្រាមមុននឹងឡើងជិះរថយន្ត។
ឱសថធម្មជាតិប្រឆាំងនឹងការរាលរលាកបង្កដោយមេរោគ គឺខ្ញី ! ជាពិសេសសម្រាប់អ្នកដែលចង់បញ្ចុះទម្ងន់ សម្រកខ្លាញ់ពោះ ដែលបង្កឡើងដោយការរលាក ឬអាហារមិនរំលាយ។ សម្រាប់ជាការប្រើប្រាស់ជាថ្នាំធម្មជាតិលាប ស្អំ ខ្ញីក៏ជាមិត្តដ៏ល្អសម្រាប់ជួយលោកអ្នកក្នុងការកាត់បន្ថយអាការៈឈឺចុកចាប់នៅ សាច់ដុំ នៅសន្លាក់ ឬការឈឺចុកចាប់បង្កឡើងការរលាកសន្លាក់ឆ្អឹង គ្រេចឬបាក់កជើង រលាកសរសៃកែង ឬរលាកសរសៃ។
ខ្ញីជាអាហារដែលអាចជួយបញ្ចុះកម្តៅ និងមានសមត្ថភាពពិសេសប្រឆាំងនឹងពពួកបាក់តេរី និងវីរុស។ ដោយហេតុតែមានសមត្ថភាពជួយពង្រឹង និងភ្ញោចសរីរាង្គកាយរបស់មនុស្សលោកនេះហើយ បានជានៅបណ្តាប្រទេសនៅអឺរ៉ុបមួយចំនួនធំមិនសូវហ៊ានទទួលទានខ្ញីដោយចំហទេព្រោះខ្ញីមានឈ្មោះជាអាហារប៉ូវចំណង់(ផ្លូវភេទ)។
ការសិក្សាវេជ្ជសាស្ត្របានបង្ហាញឱ្យឃើញទៀតថា ខ្ញីជាឱសថដ៏ប្រសើរដែលមាននាទីជាអ្នកការពារ។ ខ្ញីជាថ្នាំបង្ការប្រឆាំងនឹងទម្រង់មហារីកខ្លះ (មហារីកពោះវៀនធំ ពោះវៀនតូច កន្សោមស្បូន) ប្រឆាំងនឹងពពួកជំងឺសរសៃឈាមបេះដូង ជំងឺវង្វេងវង្វាន់ និងការពារកោសិការមនុស្សកុំឱ្យឆាប់ចាស់។ សមាសភាពនៃសារធាតុសកម្មសំខាន់បំផុតរបស់ខ្ញី gingerol មានកម្លាំងពិសេសជាអ្នកប្រឆាំងនឹងការរលាកផង ជាអង់ទីអុកស៊ីតដង់ផង។
តើត្រូវទទួលទានខ្ញីប៉ុណ្ណា ដើម្បីអាចទទួលគុណប្រយោជន៍សម្រាប់សុខភាព ?
ខ្ញីជារុក្ខជាតិដែលមានស្លឹកមានដើមដុះលើដី ប៉ុន្តែគឺមើមនៅក្រោមដីទេដែលប្រើជាថ្នាំ។ មើមខ្ញីមានផ្ទុកសារធាតុសកម្មពីរមុខ គឺ Shogaol និងGingerol ដែលដូចបានជម្រាបរួចមកហើយថាជាភ្នាក់ងារមានសមត្ថភាពផ្នែកប្រឆាំងនឹងការរលាក និងប្រឆាំងការក្អួត ព្រមទាំងពន្លឿនការរំលាយអាហារឆ្លងកាត់ពោះវៀន។ គេក៏សង្កេតឃើញមានដែរនូវប្រេងធម្មជាតិ អាមីដុង វីតាមីន (B1, B2, B3, C) និងរ៉ែជាច្រើនដូចជា (រ៉ែម៉ង់ហ្កាណែស ហ្វូស្វ័រ ម៉ាញេស្យូម កាល់ស្យូម សូដ្យូម និងដែក) ដែលមានឥទ្ធិពលខ្លាំងក្នុងការផ្តល់ថាមពលដល់សរីរាង្គកាយមនុស្ស។
ការទទួលទានខ្ញីជាប្រចាំនឹងធ្វើឱ្យយើងមានសុខភាពល្អរឹងមាំ។ ហើយបើចង់ឱ្យកាន់តែប្រសើរទៀត សូមបរិភោគខ្ញីលាយជាមួយល្មៀត និងឈើអែម។
លោកអ្នកអាចទទួលទានខ្ញីបានគ្រប់ពេលវេលាជាប្រចាំ និងច្រើនដងក៏បានក្នុងមួយថ្ងៃជាបន្លែឆៅ-ឆ្អិន ជាអន្លក់ ឬភេសជ្ជៈ ជាខ្ញីស្រស់ជាខ្ញីក្រៀម កៀបយកទឹក ឬហាន់ជាចំណិតតូចស្តើងឬឆ្មារៗ តាមការចូលចិត្ត។
ដើម្បីបានទទួលផលល្អអំពីខ្ញី បរិមាណដែលល្អបំផុត គឺទទួលទានឱ្យបាន ពី ២ ទៅ៥ក្រាម នៃខ្ញីសម្ងួត ពីរឬបីដងក្នុងមួយថ្ងៃ។ លោកអ្នកអាចយកខ្ញីជាតែដោយយកម៉្សៅខ្ញី ខ្ញីក្រៀម ខ្ញីលីង ឬខ្ញីស្រស់ហាន់ៗឱ្យឆ្មារទៅឆុងជាមួយទឹកពុះ រួចចាំ៥នាទីសឹមបរិភោគជាទឹកតែខ្ញីសុទ្ធក៏បាន ឬលាយទឹកឃ្មុំបន្តិចរឹតតែមានរសជាតិ។ វិធីម្យ៉ាងទៀត គឺកៀបច្របាច់យកទឹកខ្ញីពី១០ទៅ២០ដំណាក់រួចលាយជាមួយទឹកក្តៅឧណ្ណៗដើម្បីបំបាត់អាការៈឈឺបំពង់ក ឬជាភេសជ្ជៈលើកកម្លាំង។
របៀបបរិភោគមានច្រើនបែបច្រើនយ៉ាងណាស់ទៅតាមការចូលចិត្ត និងទម្លាប់ក្នុងគ្រួសារ ឬទៅតាមស្ថានការណ៍ ប៉ុន្តែគេប៉ាន់ស្មានថា គួរតែបរិភោគខ្ញីយ៉ាងតិចណាស់ក៏ ៥០០មីល្លីក្រាម និងច្រើនបំផុត ១៥០០មីល្លីក្រាមក្នុងមួយថ្ងៃទើបបានខ្ញីអាចផ្តល់ឥទ្ធិពលល្អចំពោះសុខភាព និងរាងកាយយើងបាន។
ដើម្បីជាជំនួយក្នុងការគិត យើងសូមជម្រាបជូនថាម៉្សៅខ្ញីស្ងួត១ក្រាមស្មើនឹងខ្ញីស្រស់១០ក្រាម។ ខ្ញីចាស់ហិរជាងខ្ញីខ្ចី ដូច្នេះប្រសិនបើអ្នកមាននិស្ស័យមិនចូលចិត្តហិរ ឬគ្មានទម្លាប់ទទួលទានអាហារហិរ សូមចាប់ផ្តើមបរិភោគខ្ញីក្នុងបរិមាណតិចសិន រួចសឹមដំឡើងបន្តិចម្តងៗ ឱ្យគ្រប់ដល់៥០០មីល្លីក្រាម។ អ្វីដែលល្អបំផុតរបស់ខ្ញីគឺបើទោះជាអ្នកទទួលទានរាល់ថ្ងៃ និងច្រើនបន្តិចក្តីក៏គ្មានផលប៉ះពាល់បន្ទាប់បន្សំអ្វីធ្ងន់ធ្ងររំខានដល់សុខភាពដែរ។
ប៉ុន្តែចំពោះការប្រើខ្ញីឬទឹកខ្ញីទៅលាបរឹតឬស្អំ ចំលើកន្លែងមានការឈឺចុកតាមសន្លាក់ ដែលជាវិធីព្យបាលបែបបូរាណ វាអាចមានផលរំខានជាការរលាកស្បែក។ ជាការប្រុងប្រយ័ត្ន ថ្វីបើចាស់បុរាណខ្មែរមានទម្លាប់ ឱ្យស្ត្រីទើបសម្រាលកូនរួចទទួលទានខ្ញីច្រើន (បាយខខ្ញី ឆុងតែខ្ញី) ពេលក្នុងខែដើម្បីកម្តៅសរសៃនិងបង្ហូរឈាមអាក្រក់ឱ្យធ្លាក់ចេញមកក្រៅអស់ អ្នកឯកទេសវេជ្ជសាស្ត្រសូមណែនាំអ្នកជំងឺត្រៀមចូលវះកាត់មិនឱ្យបរិភោគខ្ញីឡើយព្រោះខ្ញីមានសមត្ថភាពពង្រាវឈាម៕
ប្រភព៖ km.rfi.fr